Капиталните издатоци за 2026 година се предвидени на реално ниво, базирано врз досегашното остварување и очекувањата за идната година.
При анализа на реализацијата на капиталните инвестиции, целата вина не може да се префрли само на Владата, бидејќи честопати одложувањата произлегуваат од компаниите-изведувачи кои се соочуваат со недостиг на работна сила и други пречки, изјави министерката за финансии Гордана Димитриеска-Кочоска.
“Реалноста е дека сме ги проектирале капиталните расходи на едно реално ниво. Ако ја погледнеме реализацијата на капиталнтие расходи низ годините наназад ќе видиме дека никогаш реализацијата не била согласно тоа што било проектирано. Ќе видите дека трансфери до јавните претпријатија и до акционерските друштва во сопственост на државата се дефинирани како капитални расходи”, појасни министерката во гостувањето во централниот Дневник на МТВ.
Според неа, со примена на новата методологија, според која дотациите кон јавните претпријатија и државните акционерски друштва веќе не се водат како капитални издатоци, се добива појасна и вистинита слика за реалните инвестиции.