Полицијата синоќа упаднала во илегални коцкарници во Скопје, каде на една од локациите затекнала 14 лица како играат покер. Акцијата, која е резултат на повеќемесечна истрага на ОЈО за гонење на организиран криминал и корупција (ОЈО ГОКК), резултираше со разбивање на криминална група од осум лица.
При претресите на повеќе локации во главниот град се пронајдени професионални маси за покер, чипови, карти, значителна сума на евра и денари, како и наркотична дрога. Одземени се и возила за кои се сомнева дека се купени со нелегални пари.
Според Обвинителството, групата од февруари годинава организирала игри на среќа („омаха“, „покер“, „брич“) на три тајни локации, без никаква дозвола.
„Игрите се одржувале во точно определени денови, со утврден број играчи и со однапред договорени правила и влогови. Групата поседувала каса за уплата и исплата… ангажирале лица за средување на масите, како и лица–играчи кои за надомест ги делеле картите“, откриваат од Обвинителството.
За седуммина осомничени е побаран ефективен притвор, а за една осомничена жена мерка куќен притвор.