Вкупно 8 лица се осомничени во последната акција на Финансиската полиција и битолското Обвинителство, дознава Press24 од извори во истрагата. Според информациите, меѓу приведените покрај сопственикот на компанијата Марковски, Борче Марковски, осомничен и еден вработен во оваа приватна фирма.
Останатите осомничени се дел од поранешното раководство на ЕСМ и РЕК Битола. Станува збор за технички директори. Четворица од нив утрово биле уапсени додека двајца се наоѓаат под мерки за претпазливост бидејќи се веќе осомничени во претходните истраги кои се водеа за наводен криминал во РЕК Битола.
Според информациите до кои дојде Press24 обвинителството ќе ги сомничи за тендер тежок 106 милиони денари, пари за кои компанијата требало да демонтира, транспортира и да монтира погонски станици од РЕК Осломеј во РЕК Битола.
Според нашите информации добиени од истрагата, компанијата Марковски ги демонтирала погонските станици од РЕК Осломеј, ги донела во Битола но никогаш не ги монтирала иако и тоа било дел од Договорот за јавна набавка.
Според информациите станува збор за ленти на кои се превезувал ископоот од еден на друг дел во комбинатот.
Дополнително, истрагата се сомнева и во потребата од префрлање на овие транспортни ленти од едниот во другиот комбинат, имајќи предвид дека самиот рударски проект врз основа на кој се работело во моментот предвидувал транспортот на ископините да се врши со багери и камиони од една до друга точка што го отвора прашањето, зошто било потребно да се префрлаат транспортните ленти од едниот во другиот комбинат, а сомнежите се дека тоа се правело за да се испумпуваат пари од буџетот.
Од Обвинителството официјално потврдуваат само дека се постапува по наредби на ОЈО Битола без повеќе детали. Оттаму велат дека сите информации наскоро ќе бидат споделени со јавноста.
Неофицијално, сите 6 осомничени лица кои се приведени утрово во моментов се наоѓаат во полициска станица и се чека до крајот на денов или утре наутро да бидат изведени пред надлежен судија на претходна постапка кој би одлучувал по евентуално побараните мерки од надлежниот Обвинител.
Борче Марковски е битолскиот бизнисмен кој утрово во акција координирана меѓу битолското обвинителство и Финансиската полиција бил приведен за наводни злоупотреби при тендерска постапка тешка над 100 милиони денари.
Борче Марковски е сопственик на компанијата Марковски компани која што во време на претходната власт редовно добиваше тендери за ископ на јаловина во рудниците во РЕК Битола. Тој истовремено е и конзул на Белорусија во Македонија.
Според Централниот регистар, „Марковски Компани“ е основана во 2002 година, со седиште во Битола и дејност насочена кон нискоградба, земјени работи, изградба на патишта и ископи. Компанијата располага со возен и машински парк и има повеќе од 300 вработени. Во последните години бележи значителен раст на приходите — во 2024 година тие достигнале речиси 2,8 милијарди денари, што ја вбројува меѓу најголемите градежни фирми во регионот.
Најголемиот бизнис-исчекор на „Марковски Компани“ дојде со склучувањето на договори со РЕК Битола, дел од државната компанија Електрани на Северна Македонија (ЕСМ). Станува збор за договори за ископ на јаглен и јаловина, како и за одржување и механизација во рудничките постројки. Еден од најголемите тендери, објавен во 2023 година, вредеше околу 46 милиони евра, што беше рекорден износ во историјата на овој комбинат.