Денеска нè очекува променливо облачно време со повремени локални врнежи од дожд, кои ќе бидат поизразени во претпладневните часови во источните делови на земјата. На планините и на повисоките места се очекуваат врнежи од снег.
Според синоптичарите, попладне врнежите ќе престанат во целата држава, а ќе дува слаб до умерен северен ветер. Максималните температури ќе се движат во интервал од 3 до 9 степени, додека минималните ќе се спуштат до 2 степени.
Во Скопје времето ќе биде облачно, особено претпладне со повремени врнежи од дожд и слаб до умерен северен ветер. Температурата во главниот град ќе се движи од 3 до 6 степени.
Од петок следува стабилизирање на временската состојба. За време на викендот и на почетокот на следната недела се најавуваат ведри и студени утра со температури кои во целата земја ќе паднат под нулата.