Од денеска, 1 февруари, официјално почнува со целосно функционирање системот „Безбеден град“. Министерството за внатрешни работи (МВР) информира дека системот ќе биде активен на територијата на градовите Скопје, Куманово и Тетово, како и долж магистралните патишта на Коридорите 8 и 10.
Ова означува крај на толеранцијата и почеток на санкционирање на граѓаните чии прекршоци ќе бидат детектирани од поставените камери. Системот автоматски ќе регистрира четири типа на најчести сообраќајни прекршоци:
- Управување со брзина поголема од пропишаната;
- Минување на црвено светло;
- Непрописно паркирање;
- Управување возило со истечена регистрација.
Од МВР појаснуваат дека камерите се стратешки поставени на критичните точки каде статистички најчесто се случуваат прекршоци. „Системот ќе го регулира сообраќајот, а ќе ги санкционира сите оние што не сакаат да ги почитуваат правилата на сопствена штета и на штета на другите“, велат од МВР.