Демократската унија за интеграција (ДУИ), како водечка партија во коалицијата Национална алијанса за интеграција (НАИ), го доживеа најтешкиот изборен пораз во својата политичка историја.
Според првичните резултати, ДУИ победи само во четири рурални општини – Студеничани, Чашка, Липково и Пласница. Урбаните бастиони Струга и Кичево, кои со години беа симбол на нивното влијание, овојпат преминаа во рацете на коалициските партнери ВРЕДИ и ВМРО-ДПМНЕ.
Ахмети го призна поразот: „Време е за обнова и самокритика“
Лидерот на ДУИ, Али Ахмети, по објавата на резултатите јавно го призна поразот, нагласувајќи дека за партијата следи период на „обнова и самокритика“.
Тој сепак истакна дека ДУИ на национално ниво добила над 23.000 гласа повеќе од ВРЕДИ, но дека конечниот резултат бил „последица на уцените на државниот апарат и непринципиелните коалиции“.
По неговото обраќање, централното партиско седиште во Мала Речица беше затворено, а атмосферата таму беше тивка и без вообичаеното славје.
Дали се тресе фотелјата на Ахмети
Веројатно не. Колку и да изгледа чудно, Ахмети е веројатно единственото сврзно ткиво на ДУИ. Партијата која гради култ околу неговиот лик, веројатно и нема да може да протурка низ процесот на регенерација. Ахмети во моментов го има првиот и последниот збор во Мала Речица па негова смена на конгресот кој партијата го најави пред крајот на годинава е тешко веројатен епилог.
Дека не планира да си замине потврди и самиот тој вечерта кога го призна поразот за кој рече дека е победа бидејќи на советничките листи освоил поголем број на гласови.
Коалицијата загуби на куп
Поразот ДУИ веројатно ќе го боли повеќе ако на се се додаде дека на овие избори како и на претходните тој влезе во коалиција со голем број на партии. Иако ниту една од нив од овие избори не доби свој градоначалник сепак заедничкиот настап е доволен да се констатира дека Вреди ги победи на локалните избори сите албански партии на куп.
Клучните прегласувања во Гостивар и Врапчиште
Судбината на дел од општините ќе се решава на прегласувањето во Гостивар и Врапчиште, каде кандидатите на ДУИ освоија најмногу гласови, но изборите беа поништени поради недостигање цензус.
Особено ќе биде интересно да се види што ќе му направи на ДУИ прегласувањето во Гостивар. Надолнината по која се движи колата на ДУИ може да ги натера коалиционите партнери, пред се Таравари кој има историја на меѓупартиски миграции а е клучен во општина Гостивар да се реши за нова политичка авантура.
Таквиот развој на настаните може да доведе до целосен распад на коалицијата но и силен удар врз ДУИ кои веќе ја немаат зад себе приказната за легитимитетот на албанските гласачи.