На територијата на државата денеска до 13 часот беа регистрирани вкупно 12 пожари на отворен простор, од кои пет се сè уште активни, еден е ставен под контрола, додека шест се целосно изгаснати.
Според информациите од Центарот за управување со кризи (ЦУК), пожарните стихии зафатија шуми, ниска вегетација, но и објекти во повеќе региони.
„Во моментов се активни пет пожари – Општина Студеничани: с. Моране – с. Вртекица – с. Рамни Габер (мешана шума). Општина Македонски Брод: м.в. Видуш, кај с. Драгов Дол и кај с. Локвица (ниска вегетација, нискостеблеста шума и грмушки). Општини Јегуновце и Сарај: с. Копанце и с. Туденце, со проширување кон с. Бојане (мешана шума). Општина Прилеп: с. Чаниште (ниска вегетација). Општина Старо Нагоричане: с. Орах, с. Диманце и с. Руганце (шумски пожар, при што е зафатена куќа)“, информираат од ЦУК.
Пожарникарите успеаја да го стават под контрола огнот кај депонијата во Општина Делчево, а во меѓувреме беа ликвидирани неколку поголеми жаришта.
„Изгаснати се пожарите кај Општина Брвеница: с. Милетино (ниска вегетација), Општина Кратово: с. Железница (депонија), Општина Ранковце: с. Ветуница (ниска вегетација), Општини Велес и Зелениково: с. С’лп, м.в. Горно Село, со проширување кон с. Карабуниште и с. Бузалково, како и кон селата Добрино и Тисовица (ниска вегетација, дабова и габерова шума и квалитетна дабова шума)“, додаваат од ЦУК.
Од Центарот дополнуваат дека се целосно изгаснати и пожарите во селото Батинци во Општина Студеничани, како и во селото Палиград во Општина Зелениково.