Собранието на Црна Гора денеска ги усвои измените и дополнувањата на Законот за здравствено осигурување, со кои на жените со дијагностицирана секундарна дисменореа им се овозможува право на два дена платено отсуство секој месец.
Како што пренесуваат медиумите во регионот, ова право се однесува на жени чии болни менструални циклуси се предизвикани од органски причини и гинеколошки заболувања, како што се ендометриоза, миоми, полипи и слични состојби.
Иницијативата за законските измени ја поднесе независната пратеничка Јевросима Пејовиќ во март годинава, а предлог-законот претходно доби едногласна поддршка на матичните собраниски комисии.
Во образложението на измените се наведува дека целта е адекватно регулирање на патолошките состојби, отстранување на стигмата и предрасудите на работното место, како и воспоставување рамнотежа меѓу здравјето и професионалните обврски. Со ова, на жените со оваа дијагноза официјално им се признава правото на посебна состојба на привремена спреченост за работа.
Инаку, секундарната дисменореа подразбира сериозни менструални тегоби предизвикани од дијагностицирани гинеколошки заболувања, кои често се проследени со силни грчеви, гадење, замор и дополнителни здравствени компликации.