Македонија денеска се наоѓа под влијание на променлива облачност која ќе донесе повремени локални врнежи од дожд. Според синоптичарите, денешниот ден ќе го одбележи и умерен до засилен ветер кој ќе дува од јужен правец.
Максималните температури во земјава ќе се движат во интервал од 8 до 15 степени, додека во главниот град Скопје се очекува температура до 10 степени со услови за повремен дожд.
„Под влијание на циклонска активност во следните денови времето ќе биде променливо облачно и потопло со повремени локални врнежи од дожд. Пообилни врнежи се очекуваат кон средината на следната седмица“, најавуваат од УХМР.
Особена промена се очекува кај утринските температури кои во наредниот период насекаде ќе бидат позитивни, што значи дека студените утра привремено се повлекуваат.