Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, среде војна од целосен обем, остануваат заедно во одбраната на домот, семејството, традицијата и надежта за мир.
„Вечерва е Бадник – време што нè потсетува на сето она што ги прави Украинците тоа што се,“ порача Зеленски, истакнувајќи дека и покрај војната, заедништвото не може да им биде одземено.
Тој нагласи дека Украинците денес го бранат правото на мирен дом, семејна топлина и чувство на сигурност, додавајќи дека далечината не може да го раздели народот.
„Украинците се заедно, без разлика каде се. И никој не може да ни го одземе тоа чувство,“ истакна Зеленски.
Призна дека Божиќ се одбележува во исклучително тежок момент и дека не сите се вечерва дома, но нагласи дека Русија не може да го окупира украинското срце и верата меѓу луѓето.
Посебно се осврна на војниците на фронтот, истакнувајќи дека најважна е можноста да се слушне нивниот глас и пораката „Добро сум“.
Зеленски порача дека најубавиот божиќен звук е тишината без дронови и проектили, и потсети дека Русија и во пресрет на празникот извршила масовни напади.
Украина од 2023 година официјално го одбележува Божиќ на 25 декември, по напуштањето на Јулијанскиот календар, како дел од оддалечувањето од руското религиозно и културно влијание и приближување кон европската традиција.