Четири компании се јавиле на повторениот тендер за набавка на 150 електрични автобуси и 75 станици за полнење. Вицепремиерот и министер за транспорт Александар Николоски сепак не открива кои се компаниите и вели, в понеделник ќе се знае откако ќе го добие извештајот од Комисијата за евалуација.„Во понеделник ќе го добијам извештајот, можам да кажам дека четири компании аплицирале. Навистина се надевам дека овојпат повикот ќе биде успешен и дека ќе имаме успешна набавка на автобусите. Имајќи ги предвид искуствата од минатиот повик, се надевам дека е поука и за компаниите да понудат добра и квалитетна документација“, изјави Николоски.
На прашањето дали станува збор за европски компании и дали меѓу нив има учесници од претходниот оглас, Николоски рече дека не располага со тие информации, бидејќи не сакал да влијае врз работата на Комисијата.
„Законот вели дека се формира Комисија, составена од претставници на Министерството за транспорт и Машинскиот факултет, а министерот е известен со извештај. Токму затоа што оваа постапка побудува голем интерес, не сакам на ниту еден начин ниту да влијаам, ниту да се мешам во работата на Комисијата. Во моментот кога ќе го добијам извештајот, тој ќе биде споделен со јавноста“, посочи тој.
Повторениот тендер беше распишан откако претходната постапка за набавка беше поништена. Според тендерската документација, автобусите треба да бидат во црвена или бела боја, со најмалку 30 седишта плус возачкото, капацитет за најмалку 66 патници, место за инвалидска количка и мануелна пристапна платформа. Полначите треба да имаат моќност од најмалку 120 kW по приклучно место, а избраниот оператор ќе треба да обезбеди четиригодишна гаранција и редовно одржување на автобусите и станиците за полнење.
Сто од електричните автобуси треба да го подобрат јавниот превоз во Скопје, а 50 ќе добијат неколку другите градови.