Словенечкиот перкусионист, тапанар и композитор Златко Каучич вечерва ќе го отвори 45. издание на Скопскиот џез-фестивал (СЏФ), со настап во Националната опера и балет. Тој ќе настапи со својот состав „Комбо БЦ“ и проектот Bravery of the Brave („Храброста на храбрите“).
По него, на сцената ќе се претстави австрискиот тенор-саксофонист, кларинетист и композитор Леонхард Скорупа, со својот меѓународен состав Quispel Quintet. За отворањето на фестивалот, Скорупа подготви ново музичко дело, во кое основниот петчлен ансамбл ќе биде проширен со тројца македонски музичари: Божидар Пеиќ на виолончело, Бојан Талевски на виола и Ѓорѓи Петрушевски на обоа. Осумтемина ќе настапат како Quispel Octet.
Полноќниот концерт е резервиран за италијанско-американското дуо составено од вибрафонистот Пасквале Мира и вокалистот Хамид Дрејк, еден од најзначајните перкусионисти на современата импровизирана џез-сцена.
Втората фестивалска вечер, на 16 октомври, ќе донесе настап на норвешкото дуо Еивинд Орсет на гитара и електроника и Јан Банг со лајв семплинг. Од Исланд пристигнуваат композиторот и бас-гитарист Скули Сверисон и композиторката и мултиинструменталистка Олоф Арналдс. Полноќната програма ќе биде посветена на норвешкиот музички фестивал Punkt од Кристијансанд, со неговите основоположници Јан Банг и Ерик Хоноре.
На 17 октомври програмата ќе започне со македонскиот квинтет предводен од вокалистката Андреа Мирчевска, која ќе го претстави проектот Lullaby for Lunatics. Од 22 часот ќе настапи јужноафриканскиот композитор и пијанист Ндудузо Махатини, кој подолго време снима за престижната издавачка куќа Blue Note.
Полноќниот концерт на малата сцена во НОБ ќе го одржат британскиот композитор, пијанист и органист Александар Хокинс и шведската вокалистка со етиопско потекло Софија Јернберг, со заедничкиот проект Musho.
Последната фестивалска вечер, на 18 октомври, ќе го донесе бразилско-американското трио Sao Paulo Underground, кое, според организаторите, ги проширува границите на електроакустичната композиција, спонтаното компонирање и звучната инвенција.
Фестивалот ќе заврши со концерт на квинтетот Living Being, предводен од францускиот хармоникаш Винсент Пеирани. За последната вечер не е предвиден полноќен концерт.
Годинава на Скопскиот џез-фестивал ќе учествуваат рекорден број изведувачи од 13 земји. Во текот на четирите фестивалски дена се предвидени осум концерти со почеток во 20 и 22 часот на големата сцена во Националната опера и балет, како и три полноќни настапи на специјално подготвената мала сцена во НОБ, наместо во МКЦ, каде што се одржуваа во претходните години.
Традиционално, фестивалот го прогласи и најдобриот македонски џез-музичар за 2026 година. Признанието годинава му припадна на кларинетистот и саксофонист Нинослав Спировски.