Претседателот на Чешка, Петр Павел, предупреди дека руските упади во воздушниот простор на земјите-членки на НАТО не можат бесконечно да се толерираат, и дека алијансата можеби ќе мора да собори руски воен авион, доколку ваквите провокации продолжат.
Изјавата Павел ја даде во дебата со ученици во градот Соколов, при што потсети на инцидентот во 2015 година, кога Турција собори руски авион што го наруши нејзиниот воздушен простор.
„Има народи на кои им е доволно да им се каже: немојте тоа да го правите, лошо ќе заврши. Во случајот на некои, мора лошо да заврши за да сфатат дека тоа не е исправен пат,“ изјави Павел.
Тој додаде дека Русија денес ја тестира решеноста на НАТО не само преку пробивања на воздушниот простор, туку и преку проверка на функционирањето на интегрираниот систем за одбрана на алијансата.
„Русија денес го пробува тоа со нас. Тестира не само како функционира противвоздушната одбрана на одделни земји и интегрираниот систем на НАТО, туку и колку сме решени навистина да се браниме,“ порача чешкиот претседател пред учениците од регионот Карлови Вари, на западот на земјата.