Кршливото примирје меѓу САД и Иран веќе ги покажува првите пукнатини на светските пазари. По големото израелско бомбардирање на Либан, стравот од тотална ескалација повторно ги вознемири инвеститорите, што резултираше со пад на акциите и скок на цената на енергенсите.
Суровата нафта „Брент“ утрово поскапе за над два отсто и се тргува за 96,70 долари по барел. Ова доаѓа по вчерашниот остар пад од 13 проценти, кога пазарите првично се надеваа на деескалација. Сличен тренд е забележан и кај американската нафта (WTI), која порасна за 2,8 отсто, поттикната од неизвесноста околу безбедноста на Ормутскиот Теснец. Иако цените се пониски од минатонеделните максимуми, тие остануваат екстремно високи во споредба со периодот пред почетокот на војната на 28 февруари.