Околу 50 лица ангажирани со договор за дело на Клиниката за детски болести излегоа на мирен протест пред Министерството за финансии. Медицинскиот и административно-техничкиот персонал реагираат дека од Нова година немаат земено ниту денар, а покрај исплатата на заостанатите плати за пет месеци, бараат и конечно решавање на нивниот работен статус.
Проблемот е дополнително комплициран бидејќи вработените годинава немале потпишано никаков договор. Иако редовно оделе на работа, дури во април пристигнало негативно мислење од надлежните за нивниот понатамошен ангажман на Клиниката.
Што велат револтираните работници?
Претставници на незадоволните вработени по средбата во Министерството за финансии изјавија дека добиле само ветување за проверка на случајот, но не и конкретно решение.
„Ни кажаа дека ќе видат каде е проблемот во процесот од почеток, што се случило, зошто е вратено негативно. Зошто толку време е одолговлечена оваа работа“, изјави Седат Буши, работно ангажиран на Клиниката за детски болести.
Неговата колешка дополнува дека сè уште се во мрак околу причините за ваквата ситуација:
„Некои викаат не е листата поднесена добро, не знаеме што е проблемот. Немаме никаков одговор конкретно“, изјави Фљора Гаши, исто така работно ангажирана на Клиниката.
Меѓу оние кои протестираат и си ги бараат заработените пари, има и такви кои со години работат во оваа јавна здравствена установа без трајно решение.
„Која е логиката, работиме во здравство, а немаме здравство. Идеме на работа за да добиеме решение. Има колешки што со договор работат 8 години“, рече Седат Буши.
Финансии се повикува на законите, Клиниката предупредува на колапс
Од Министерството за финансии кратко одговорија дека ги сослушале барањата на договорците, но нагласуваат дека тие само ги следат законските процедури:
„Во рамки на своите надлежности, Министерството по секое доставено барање од буџетски корисник кое се однесува на нови вработувања, ангажирање или трансформација на работен однос постапува и доставува известување во законски утврдениот рок, согласно Законот за буџети“, велат од Финансии.
Од друга страна, раководството на Клиниката за детски болести застана во одбрана на своите работници. Оттаму тврдат дека сите потребни барања за ангажманот на договорците биле поднесени навреме. Клиниката алармира дека овој персонал им е неопходен, бидејќи доколку тие си заминат, сериозно ќе биде нарушено нормалното и секојдневно функционирање на целата установа.