„Треба да имате дигнитет за да зборувате за кадровите решенија коишто се случуваат во Владата, бидејќи вие доаѓате како поранешни министри, поранешни директори, сега сте пратеници од страна на СДС и секојпат кога зборуваме за политиките за мене најздраво е да се споредиме бидејќи само така можеме да видиме дали нешто правиме позитивно или правиме негативно и сè додека сме тука ќе слушате споредби“, рече пратеничката од редовите на ВМРО-ДПМНЕ, Драгана Бојковска, на денешната собраниска седница.
Бојковска потсети дека СДС беше на власт до пред две години, а не до пред една деценија и укажа во каква состојба беше затекната државата во моментот кога власта, пред две години, ја презеде ВМРО-ДПМНЕ.
„Јавните финансии под тотален притисок, двоцифрана инфлација претходно со вас, 9 милијарди евра долг со сè камати коишто оваа Влада треба да ги исплати, вие како директор на Управата за јавни приходи, морам да споредам, дека имавте исто така помало ниво на наплата на даноци наспроти сега каде што ја стабилизираме економијата, каде што имаме, во јуни месец, и најниска инфлација во регионот. Тоа се фактите, тоа не се податоци од штабот на СДС“, кажа Бојковска.
Пратеничката Бојковска се осврна и на секторот транспорт и истакна дека сега се реализираат шест автопатски делници, за разлика од измислените километри на автопати за време не владеењето на СДС. Исто така Бојковска ги спомена и состојбите во социјалата присутни во времето кога СДС ја водеше државата и потсети на протестите и празните џебови на пензионерите, додека тогашната министерка, како што вели Бојковска, истите ги навредуваше.
„Тогаш во седум години власт на СДС минималната пензија порасна за 5000 денари вкупно, со ВМРО-ДПМНЕ за 7000 денари во година и половина“, кажа Бојковска и додаде:
„Во делот на здравството ќе останете препознаени по делот на донацијата на вакцините, ќе останете запаметени во делот на тендерите на Венко Филипче, во делот на образованието ќе останете запаметени по тоа што немавте учебници за учениците, немавте никаков концепт на образование, апсолутно погубен, она на Мила Царовска, во делот на Министерството за внатрешни работи по белосветските криминалци коишто добиваа пасоши“.