По вчерашниот инцидент за време на свечената вечера на Здружението на дописници во Белата куќа, администрацијата во Вашингтон сериозно размислува за дополнителни безбедносни мерки. Како што пренесува Питер Дуси, висок кореспондент на Fox News, во тек се внатрешни дискусии за засилување на личната заштита на претседателот Доналд Трамп, вклучително и можноста тој да носи заштитен елек (панцир) при идни јавни настапи.
Инцидентот се случи во хотелот „Вашингтон Хилтон“, каде претседателот и првата дама Меланија Трамп беа итно евакуирани откако беа испукани меѓу пет и осум истрели. Во пукањето беше ранет припадник на обезбедувањето, чиј живот беше спасен токму благодарение на заштитната опрема што ја носел.
Напаѓачот е идентификуван како 31-годишниот Коул Ален, по професија наставник, кој бил вооружен со пушка и пистол. Тој е веќе во притвор, а истражителите, преку анализа на неговите профили на социјалните мрежи, открија реторика насочена против Трамп и христијанството. Иако самиот напаѓач изјавил дека цел му биле „американски државни функционери“, истрагата продолжува.
Вршителот на должност генерален обвинител на САД, Тод Бланш, потврди дека против Ален се подигнати три првични обвиненија: две за употреба на огнено оружје и едно за напад врз федерален службеник со опасно оружје.
Настанот предизвика бура во јавноста. Републиканскиот конгресмен Мајк Лоулер ја пофали брзата реакција на Тајната служба, но истовремено нагласи дека воопшто не смеело да се дозволи да дојде до ваков безбедносен пропуст. Како превентива од можни нови напади, полицијата во Њујорк веќе ги зголеми мерките за безбедност околу облакодерот „Трамп Тауер“ во Менхетен.