Делегација на Стопанска комора на Северна Македонија присуствуваше на свеченото одбележување на 80-годишнината од основањето на Економскиот факултет, Универзитет во Љубљана, еден од најпрестижните економски факултети во Словенија и регионот на Централна и Југоисточна Европа. Факултетот, основан по Втората светска војна, постепено се разви во модерна, меѓународно ориентирана бизнис-школа и редовно е вклучен меѓу 95-те најдобри високообразовни институции во Европа според рангирањето на Financial Times. Тој поседува три најпрестижни меѓународни акредитации за бизнис-школи: AACSB International, EQUIS и Association of MBAs (AMBA), што го позиционира факултетот во глобалната елита на бизнис образованието. На настанот се обрати и претседателката на Република Словенија, Наташа Пирц Мусар.
Претседателот на Стопанската комора, Бранко Азески, кој е член на Советодавниот одбор на факултетот, активно учествуваше во дискусијата посветена на долгорочната стратегија на институцијата и предизвиците поврзани со наставните методи во ерата на вештачката интелигенција. „Вештачката интелигенција треба паметно да се користи за унапредување на образованието, а не да ја потиснува аналитичката и критичката мисла на младите генерации дипломци и постдипломци“, истакна Азески.
Членови на Советодавниот одбор се и Ана Паула Африкано С. Силва од Универзитетот во Порто, проф. Ана Бломбек од меѓународниот факултет за бизнис во Јеншепинг, проф. Хана Холмс од Градскиот универзитет во Манчестер, Паола Папаниколау од банкарската групација „Intesa Sanpaolo“, проф. Маркус Рудолф од Факултетот за менаџмент „Ото Бајсхајм“ во Диселдорф, проф. Руперт Заусгрубер, ректор на Виенскиот универзитет за економија и бизнис, Јанез Шкрабец, генерален менаџер на „Riko d.o.o.“ од Словенија, Бранко Зибрет од „Kearney“ во Австрија и Валтер Лебан, претседател на Управниот одбор и CEO на “Колектор” АД, Словенија.