Британската кралска морнарица три дена ја следела руската подморница во Ламанш, и тоа во услови на силно невреме, пренесе ДПА. Во операцијата бил вклучен бродот за поддршка RFA Tidesurge, опремен со хеликоптер Merlin, кој ја надгледувал подморницата од класата Кило – „Краснодар“, како и придружниот реморкер „Алтај“.
Руските пловила минувале западно од Северното Море, потоа низ Доверскиот Теснец и влегле во Ламанш.
„Нема ништо како руска подморница за да го изостри вниманието на секој морнар“, изјави капетанот Џејмс Ален, командант на RFA Tidesurge.
„Одржувањето отворено присуство и континуирано надгледување на руските пловни објекти во водите на Обединетото Кралство е од витално значење за националната безбедност“, додаде потполковникот Дејвид Емери од Атлантската ескадрила на 814. поморски воздушен ескадрон.
Подморницата, која пловела на површината и покрај лошите временски услови, била следена сè до областа кај островот Ушан, северозападно од Франција, по што Tidesurge ја предал задачата за набљудување на сојузничка НАТО-земја. Хеликоптерот Merlin останал на бродот за целото времетраење на мисијата.
Ова е втора операција од ваков тип за кратко време. Во јули, HMS Mersey, хеликоптер Wildcat и специјализиран авион Merlin за откривање подморници ја следеа руската подморница Novorossiysk додека пловеше долж британските води.
Паралелно со тоа, британскиот министер за одбрана Џон Хили го претстави „Атлантски бастион“ – нова, високо технолошка структура вредна милиони фунти, наменета за заштита на подводните кабли и енергетски линии од можни руски саботажи.
Министерството за одбрана претходно објави дека во последните две години е забележано 30% зголемување на руските пловни објекти кои го „загрозуваат“ британскиот морски простор.
Обединетото Кралство неодамна го потпиша и одбранбениот пакт Lunna House со Норвешка, со цел дополнителна заштита на подводната инфраструктура од потенцијални руски активности.