Три лица се заразени со антракс во бугарското село Стефаново, во областа Ловеч, откако консумирале месо од заболено животно. Бугарската агенција за безбедност на храната потврди примарно огниште на антракс во сточарска фарма во која се одгледуваат 205 говеда.
Станува збор за сопружници кои се занимаваат со сточарство и нивен близок пријател. Истрагата почнала откако на 24 август биле примени информации за пациенти во здравствена установа со сомнение за антракс.
Според досегашните информации, сопственикот на фармата забележал симптоми кај едно од говедата, по што животното било заклано, а месото ставено во замрзнувач. Се претпоставува дека трите лица се заразиле откако јаделе од месото. Втората лабораториска анализа го потврдила присуството на бактеријата што предизвикува антракс.
Фармата е ставена во карантин, а ветеринарните служби извршиле дезинфекција на објектот, местото каде што било заклано животното и пасиштата. Месото од замрзнувачот е одземено, а говедата и овците во двете стопанства биле клинички прегледани. Засега кај останатите животни не се забележани отстапувања во телесната температура или други видливи симптоми.
По потврдата на огништето започнала и вакцинација на стотици говеда и овци во погоденото подрачје, а животните ќе бидат под секојдневен ветеринарен надзор.
Антраксот е акутна заразна болест која може да ги зафати и животните и луѓето. Најчувствителни се тревопасните животни, особено овците, козите и говедата. Луѓето може да се заразат при директен контакт со заразено животно или негови производи, како и преку консумирање контаминирано месо.