Според најновата анкета на Рускиот фонд за истражување на јавното мислење (ФОМ), 75 проценти од руските граѓани изјавиле дека му веруваат на претседателот Владимир Путин, додека 76 проценти позитивно ја оценуваат неговата работа.
На официјалната страница на ФОМ се наведува дека само 13 проценти од испитаниците изразиле недоверба кон рускиот лидер. Во однос на извршувањето на претседателските функции, 76 проценти сметаат дека Путин успешно ја извршува својата улога, додека 10 проценти имаат спротивно мислење, пренесува РИА Новости.
Во однос на руската влада, 46 проценти од граѓаните се задоволни од нејзината работа, а 31 процент се изјасниле како незадоволни. Премиерот Михаил Мишустин добил позитивна оценка од 53 проценти, додека 14 проценти не го одобруваат неговиот ангажман.
Ако следната недела се одржат избори за Државната дума, 39 проценти од испитаниците би гласале за партијата „Единствена Русија“, 9 проценти за Либерално-демократската партија, 8 проценти за Комунистичката партија, 4 проценти за „Новите луѓе“ и 3 проценти за „Праведна Русија“.
Истражувањето ФОМнибус било спроведено од 14 до 16 ноември врз примерок од 1.500 испитаници постари од 18 години, во 97 населени места низ 51 федерален субјект на Русија.