Нови тешки пожари избувнаа попладнево на територијата на Волково и во општина Сопиште, зад планината Водно, информираше Стојанче Ангелов.
Според првичните информации, Бригадата за противпожарна заштита (БППЗ) Скопје веќе го става под контрола пожарот во Волково.
Во исто време, започнува интервенција на скопските пожарникари и во општина Сопиште, каде што како поддршка се упатени и четири пинцгауери на Дирекцијата за заштита и спасување (ДЗС).
Пожар беше регистриран и во близина на Јажинце, но благодарение на брзата реакција на терен, истиот е успешно ликвидиран.
„Пред малку поголем пожар изби во близина на Јажинце, благодарение на брзата интервенција на тетовските пожарникари, локалното население и полицијата истиот е брзо изгаснат“, соопшти Ангелов.
Надлежните екипи остануваат на терен за целосно справување со огнената стихија на критичните точки.