Македонија го освои 30. место меѓу 155 рангирани држави на Глобалниот индекс за сајбер-безбедност (NCSI), бележејќи скок од 29 позиции со освоени 84,17 поени од можни 100, соопшти Министерството за дигитална трансформација.
Со овој резултат, државата се вбројува меѓу земјите со високо ниво на подготвеност за спречување сајбер-закани и за управување со сајбер-инциденти.
Глобалниот индекс за сајбер-безбедност го развива естонската „Академија за е-управување“ (e-Governance Academy – eGA). Индексот ја оценува подготвеноста на државите преку 49 индикатори распоредени во 12 области, опфаќајќи ги стратешките, превентивните и капацитетите за одговор на сајбер-закани. Оценувањето се заснова на јавно достапни закони, официјални документи, институционални механизми и докази за практично спроведени мерки – појаснуваат од Министерството.
Според податоците, земјава бележи максимални оценки во областите на сајбер-политиките, заштитата на критичната инфраструктура, заштитата на личните податоци и борбата против компјутерскиот криминал.
Министерот за дигитална трансформација, Стефан Андоновски, посочи дека резултатот е потврда за спроведените измени во законската рамка и институционалната координација.
Скокот од 29 позиции е меѓународна потврда дека реформите што ги спроведуваме создаваат конкретни и мерливи резултати. Во изминатиот период воспоставивме појасна институционална одговорност, современа законска рамка и посилни механизми за заштита на критичната инфраструктура и за одговор на сајбер-инциденти. Овој резултат не е крајна цел, туку обврска да продолжиме уште поинтензивно да ја градиме сајбер-отпорноста на државата – изјави министерот Андоновски.
Од ресорното министерство истакнуваат дека напредокот се должи на донесувањето на Законот за безбедност на мрежни и информациски системи и Стратегијата за сајбер-безбедност 2025–2028, најавувајќи продолжување на активностите за зајакнување на дигиталната отпорност.
Безбедна дигитална држава значи сигурни јавни услуги, заштитени податоци, отпорна критична инфраструктура и поголема доверба на граѓаните во процесот на дигитална трансформација – се наведува во соопштението.