Роаминг како дома, во која било европска држава. Првиот човек на дигитална трансформација ја поздрави одлуката на Европската Комисија за отпочнување на преговорите за укинување роаминг трошоците меѓу ЕУ и Западен Балкан, вклучително и Македонија.
„Се отпочна јасен процес со јасна динамика и став на ЕУ за сите земји од ЗБ дека процесот за преговори е отворен, што значи дека можноста за пристапување на „Роаминг како дома“ имаат сите држави од Западен Балкан. Ова практично дава одговор на сите оние дилеми дека на некои од државите ќе им биде овозможена оваа погодност, на други не“, изјави министерот за дигитална трансформација Стефан Андоновски.
Што ќе значи ова за граѓаните? Кога ќе биде комплетирана целата процедура, вклучувајќи ја и промената на домашната легислативата, пакетите коишто ги плаќаат граѓаните кон домашните оператори за интернет, телефонија и СМС пораки ќе важат каде било во Европската Унија. Андоновски не сакаше да прецизира со конкретни рокови за кога „Роаминг како дома“ ќе почне да се применува во Македонија, но очекува процесот да биде заокружен оваа година.
„Нема да имаат дополнителни трошоци за повици, за пораки или за користење интернет. Нешто што граѓаните го користат од друга регионална иницијатива а тоа е роамингот за Западен Балкан. Значи дека исто како што патуваме сега во Србија, Црна Гора, БиХ, Косово, Албанија и не плаќаме за дополнителни пораки и повици и интернет, исто така нема да плаќаме и за целата ЕУ“, додаде министерот Андоновски.
Еврокомесарката Марта Кос кажа дека тошоците за роаминг се проблем за луѓето ширум Западен Балкан и затоа оваа иницијатива би значело олеснување на секојдневието.
„Тие ги погодуваат работниците кои ги преминуваат границите или семејствата кои едноставно сакаат да останат во контакт. Неочекуваните сметки или високите трошоци при патување се нешто што веќе не го познаваме во рамките на ЕУ. Предложивме ова да се прошири и на Западен Балкан. Тоа би значело полесни повици и мобилен интернет по домашни цени“, истакнала еврокомесарката на вчерашниот состанок на ЕК.
Откако Комисијата го усвои предлогот за преговарачките мандати, сега на потег е Советот на Европската Унија. Неговите претставници треба да дадат зелено светло за Комисијата да отпочне билатерални преговори со секоја држава од Западен Балкан поединечно. Доколку бидат успешно случени, овие договори ќе го отворат патот за ЗБ да стане дел од зоната на ЕУ, „Роаминг како дома“.