Старата и добро позната шема со „лажен лекар“ и наводна итна операција на близок роднина, вчера повторно профункционира, овој пат во Штип, каде жртвата претрпе огромна финансиска штета.
На 7 јануари, точно на Божиќ, 77-годишна штипјанка во полиција пријавила дека била измамена за сума од 700.000 денари. Драмата започнала со телефонски повик од непознато лице кое се претставило како лекар. Тој со вознемирен глас ѝ соопштил дека нејзината сестра итно е примена во болница со тешка скршеница на ногата и дека е неопходна операција со вградување на скапи шипки.
Водена од страв за животот на сестрата, жената поверувала во приказната. Според пријавата, таа во неколку наврати ги носела парите на договорено место и му ги предавала на измамникот. Измамата била откриена дури подоцна, кога во домот на старицата дошла нејзината внука. Тие ѝ се јавиле на „постраданата“ сестра и сфатиле дека таа е жива и здрава и дека немало никаква несреќа.