Една година по катастрофалниот пожар во Кочани, министерот за здравство Азир Алиу на Меѓународната конференција во Скопје се осврна на најтешките моменти низ кои помина здравствениот систем, но и на научените лекции. Во своето воведно обраќање, тој стави силен фокус врз пожртвуваноста на домашниот медицински кадар и помошта од меѓународната заедница во спасувањето на човечките животи.
„Посебна благодарност упатувам до повеќе од 400 здравствени работници од јавните и приватните здравствени установи од нашата држава, кои во тие денови работеа со исклучителна пожртвуваност, концентрација и професионализам. Вашата професионалност, солидарност и хуманост ќе останат длабоко запаметени. Во мигови кога секоја минута значеше надеж, вие бевте вистински партнери во борбата за секој човечки живот“, истакна Алиу пред присутните.
Министерот не ја заборави ниту клучната улога на странските држави кои ги отворија своите болници за најтешките случаи, нагласувајќи ја беспрекорната координација меѓу главниот кризен штаб, МНР и МВР, преку која дури 115 пациенти беа безбедно транспортирани на лекување низ Европа.
„Благодарност и до медицинските тимови од странските медицински центри. Таа поддршка покажа дека хуманоста, стручноста и солидарноста немаат граници кога се спасуваат човечки животи во услови кога секоја одлука мораше да биде брза и прецизна, затоа што беше од животно значење“, додаде министерот.
Осврнувајќи се на рехабилитацијата, Алиу потенцираше дека третманот на пациентите оди многу подалеку од лекувањето на самите изгореници, посочувајќи на невидливите лузни што ги остави трагедијата.
„Особено важно беше да разбереме дека последиците од една ваква трагедија не завршуваат со физичките повреди. Тие оставаат длабоки психолошки траги кај повредените, кај нивните семејства, но и кај целата заедница. Затоа, психолошката и психо-социјалната поддршка ја третиравме како составен дел од здравствениот одговор“, рече Алиу.
На крајот од својот говор, тој јасно ја лоцираше обврската на државата за во иднина, посочувајќи ја потребата од континуирано јакнење на капацитетите на медицинските тимови.
„Преку соработка, размена на искуства и обуки во странство, мора да продолжиме да го зајакнуваме знаењето и подготвеноста за третман на тешки изгореници, масовни несреќи и долготрајна рехабилитација. Нашата најголема обврска кон жртвите и кон повредените е да продолжиме да градиме систем што ќе штити, ќе реагира навреме и ќе обезбедува највисоко ниво на грижа за секој граѓанин“, заклучи министерот Алиу.