Агенцијата за национална безбедност во координација со други надлежни институции континуирано презема активности за откривање и попречување на пропагандна мрежа во земјава, која има деструктивна и малициозна агенда за остварување влијание врз јавниот дискурс, во корист на странски интереси.
Во рамки на заеднички координирани активности, на 18 септември 2026 година преземени се истражни дејствија кон македонски државјанин поврзан со странски фактори кои креираат пропаганден апарат преку мрежа на портали интегрирани во домашниот медиумски простор. Поради сомнение за сторени кривични дела меѓу кои предизвикување национална и верска омраза, одавање службена тајна и ширење расистички материјал, извршен е претрес во неговиот дом:
– Вистинските актери на оваа пропагандна мрежа која е во функција на руските интереси, се кријат преку клонирани псевдо-портали регистрирани со македонски интернет домен. Преку овие псевдо-портали се шират лажни вести, дезинформации и се врши преобликување на наративи за актуелни настани, со што се поткопува довербата во институциите и се поттикнува етничка и национална омраза и нетрпеливост.
Од АНБ нагласуваат дека акциите продолжуваат со цел целосно сузбивање на субверзивните влијанија што ги поткопуваат стратешките евроинтегративни процеси на земјата.