Агенцијата за храна и ветеринарство (АХВ) денеска организира настан по повод 15-годишнината од своето основање и одбележувањето на 7 Јуни – Светскиот ден на безбедноста на храната, кој годинава се одржува под мотото „Од товар до решенија – Безбедна храна насекаде“.
Настанот е посветен на унапредувањето на системот за безбедност на храната, здравјето и благосостојбата на животните, како и на заштитата на јавното здравје. Во фокусот ќе бидат и современите пристапи и решенија за справување со актуелните предизвици во овие области.
Воведни обраќања ќе имаат директорот на АХВ, Оливер Миланов, и заменик-претседателот на Владата задолжен за политички систем, Љупчо Димовски.
На присутните ќе им бидат презентирани и видео-пораки од претставници на Европската агенција за безбедност на храната (EFSA), Европската комисија и Светската организација за здравје на животните (WOAH).
Во рамки на настанот ќе се одржат три тематски тркалезни маси посветени на дигитализацијата и современите системи за безбедност на храната, институционалната, научната и регионалната соработка за обезбедување безбедна и квалитетна храна, како и на регионалната координација во областа на здравјето на животните и справувањето со новите закани и болести.
Од АХВ посочуваат дека настанот ќе обедини претставници на државните институции, меѓународните организации, академската заедница, граѓанскиот сектор и професионалните здруженија од земјата и регионот, со цел размена на искуства и добри практики за натамошно зајакнување на системот за безбедност на храната.