Алијансата за Албанците реагираше по информациите дека во изминатите 48 часа на педијатрија во Тетово биле прегледани 139 деца, а 12 од нив биле задржани на болничко лекување.
Од партијата бараат одговорност од надлежните институции и прашуваат каде се министрите во момент кога, како што велат, здравствениот систем во Тетово се соочува со зголемен број заболени деца.
„139 деца за 48 часа, 12 хоспитализирани. Каде се сега министрите?“, прашуваат од Алијансата, оценувајќи дека состојбата бара итна реакција и јасни информации за причините за зголемениот број пациенти.
Од партијата бараат Министерството за здравство и другите надлежни институции да соопштат дали е утврдена причината за симптомите кај децата и дали се преземаат дополнителни мерки за спречување на евентуално ширење на инфекција.
Алијансата посочува дека родителите имаат право навреме да бидат информирани за состојбата и за ризиците, особено кога станува збор за здравјето на најмладите.
Од партијата бараат и одговор дали Клиничката болница во Тетово располага со доволно персонал, лекови и капацитети за справување со зголемениот број пациенти.
Реакцијата следува откако беше објавено дека речиси 140 деца побарале медицинска помош на педијатрија во Тетово во период од два дена, а 12 биле хоспитализирани. Докторите велат дека станува збор за сезонски вируси и бактерии и дека бројките не се изненадување. Се препорачува поголемо внимание околу хигиената.