Бројот на заболени од грип во земјава бележи значителен пораст. Во периодот од 9 до 15 ноември биле евидентирани 154 нови случаи, што е за 37,5 проценти повеќе во споредба со претходната недела, кога биле пријавени 112 заболени.
Според најновиот извештај на Институтот за јавно здравје (ИЈЗ), ова е прва недела од актуелната сезона во која е надминат прагот на вонсезонска активност, а грипот достигнал ниско, односно сезонско ниво на активност на национално ниво.
Најмногу новозаболени има во Тетово, каде се регистрирани 49 случаи, а следува Скопје со 38 и Куманово со 19. Во Радовиш се пријавени 12 случаи, во Велес осум, а во Гостивар седум. Останатите се распоредени во повеќе градови низ земјата.
Податоците покажуваат дека најголем дел од заболените се на возраст од 15 до 64 години, со вкупно 102 случаи. Регистрирани се и 22 заболени лица постари од 65 години, 16 деца до четиригодишна возраст и 14 деца на возраст од пет до 14 години.
Од почетокот на сезоната 2026/2027, во земјава се евидентирани вкупно 609 случаи на грип. Тоа е зголемување од 6,7 проценти во однос на истиот период минатата сезона. Најголем број заболени досега има во Тетово, со 198 случаи.
Лабораториските анализи во текот на последната извештајна недела откриле четири позитивни примероци на вирусот на грип, од кои три се инфлуенца А, без утврден подтип, а еден е инфлуенца А(H3). Регистрирани се и три позитивни резултати на коронавирус.
Од ИЈЗ потсетуваат дека вакцинацијата останува најефикасна заштита од сезонскиот грип, особено за повозрасните лица, децата, хронично болните, бремените жени и здравствените работници.
Досега се вакцинирани 25.458 лица од ризичните категории со бесплатни вакцини. Заинтересираните граѓани можат да закажат вакцинација преку веб-страницата www.vakcinacija.mk.

