Утрово најниска температура во земјава е измерена на Попова Шапка, каде во 8:30 часот биле регистрирани 6 степени, додека најтопло било во Скопје, со измерени 16 степени на Зајчев Рид и во Петровец, покажуваат податоците на Управата за хидрометеоролошки работи.
Меѓу постудените места се и Маврови Анови со 7 степени, како и Крушево и Лазарополе со 8 степени. Во Крива Паланка биле измерени 9 степени, во Берово 10, а во Претор 11 степени.
Температура од 12 степени е регистрирана во Охрид, Виница и Струмица, додека во Прилеп, Штип и Гевгелија биле измерени 13 степени. Во Тетово, Велес, Кавадарци и Демир Капија температурата изнесувала 14 степени, а во Битола 15 степени.
Кога станува збор за врнежите во изминатите 24 часа, најмногу дожд наврнал во Лазарополе, каде се измерени 24 литри на квадратен метар. Следуваат Попова Шапка со 13 литри, Крушево со 11 и Пожаране со 9 литри на квадратен метар.
Во Прилеп се измерени 8 литри на квадратен метар, во Охрид и Претор по 7, а во Берово и Тополчани по 6 литри. Помали количества врнежи се регистрирани во Виница, Штип, Демир Капија, Струмица, Тетово, Крива Паланка, Велес и Гевгелија.
За денеска метеоролозите најавуваат променливо облачно време со повремени локални врнежи од дожд, кои ќе бидат позастапени во западните делови од земјата. Ќе дува умерен до засилен ветер од западен правец, кој повремено ќе достигнува брзина над 70 километри на час.
Дневната температура ќе се движи од 18 до 24 степени.
Во Скопје се очекува променливо облачно време со сончеви периоди. Ќе дува слаб до умерен југозападен ветер, кој повремено ќе засилува во делови од котлината, а максималната температура ќе достигне 23 степени.

