Министерката за енергетика, рударство и минерални суровини, Сања Божиновска, денеска и утре ќе учествува на Седмиот состанок на Партнерството за трансатлантска енергетска соработка (P-TEC), што се одржува во Варшава, Полска.
Како што информираат од нејзиниот кабинет, Божиновска ќе биде панелист на сесијата посветена на зајакнувањето на европската енергетска безбедност, заштитата и отпорноста на критичната инфраструктура, како и диверзификацијата на снабдувањето со енергија.
Настанот е организиран во соработка со Атлантскиот совет и претставува платформа за дијалог и размена на искуства меѓу високи владини претставници, меѓународни институции и претставници на енергетскиот сектор од Европа и САД.
Меѓу учесниците се најавени американскиот секретар за енергетика Крис Рајт, полскиот премиер Доналд Туск и министерот за енергетика на Полска, Милош Мотика.
Форумот има за цел да ја поттикне енергетската соработка меѓу Европа и САД, да овозможи размена на ставови за актуелните предизвици во секторот и да отвори можности за воспоставување нови партнерства.

