Собранието денеска ќе продолжи со 130. седница, на која на дневен ред се опозициските пратенички прашања. Тие беа прекинати на 12 ноември, по барањата за пауза од страна на пратениците од опозицијата.
Претседателот на Собранието, Африм Гаши, на брифингот со новинарите во понеделникот се осврна на дилемите околу прекинот на седницата, посочувајќи дека имало различни толкувања на собранискиот Деловник во однос на тоа дали паузите треба да се пресметуваат во предвидените два часа за поставување пратенички прашања.
Гаши објасни дека постојат одредби во Деловникот кои упатуваат на различни толкувања, но и дека досегашната практика била пратеничките прашања да се одржуваат во периодот од 11 до 13:30, односно 14 часот.
Тој посочи дека, по различните ставови на опозицијата и мнозинството, бил постигнат неформален договор паузите во иднина да не се пресметуваат во предвидените два часа, но и пратениците да внимаваат со барањата за прекин на седницата за да не го скратат времето за поставување прашања.
„Се договоривме така некако џентлменски да внимаваме во иднина. Ако има пауза, ќе гледаме во иднина да не се смета тоа во тие два часа“, рече Гаши.
Покрај опозициските пратенички прашања, на дневен ред на 130. седница се и повеќе законски и други предлог-акти.
Меѓу нив е Предлог-законот за изменување и дополнување на Законот за приватизација и закуп на градежно земјиште во државна сопственост, во второ читање, како и предлог-одлуки за измени во составот на собраниските комисии и делегациите во Парламентарното собрание на Советот на Европа и Парламентарната димензија на Централноевропската иницијатива.
Пратениците ќе расправаат и за избор на членови на Советот за граѓански надзор, именување член на Регулаторната комисија за енергетика, како и за финансискиот план на оваа комисија за 2027 година.
На дневен ред се и предлог-резолуцијата за миграциската политика на Република Северна Македонија за периодот 2026-2030 година, со Акциски план, како и одлуката за утврдување на процентот од вкупниот годишен приход за финансирање на работењето на Регулаторната комисија за 2027 година.
Во рамки на седницата се предвидени и повеќе предлог-закони по скратена постапка, меѓу кои измените на Законот за градење и Законот за рибарство и аквакултура.
Пред пратениците се и предлогот за автентично толкување на член 23 од Законот за урбанистичко планирање, како и барањето за автентично толкување на член 17 од Законот за пожарникарство, во врска со Законот за безбедност и здравје при работа, поднесено од пратеничката Славјанка Петровска.

