Кредитот од 5 милиони евра од Алта банка Белград за компанија на сватот на Али Ахмети ја потврдува заинтересираноста за влез на оваа банка во Македонија од страна на поранешната власт на СДСМ и ДУИ, изјави на денешната прес-конференција портпаролот на ВМРО-ДПМНЕ, Валентин Манасиевски.
„Сега е јасно зошто токму Фатмир Бесими, министерот за финансии во Владата на СДС и ДУИ, на владината седница од 24 октомври 2023 година ја отворил темата за Алта банка“, рече Манасиевски.
Тој посочи дека фирмата „АС Сењак“, во сопственост на сватот на Ахмети, го добила кредитот од српската банка, а истата компанија во јавноста е позната и како партнерска фирма на внукот на Али Ахмети, Дрин Ахмети, во купувањето на „Соравија“. Според него, во целиот овој процес СДСМ делува како „спотер“.
„Филипче и СДС јасно да кажат, дали тогаш кога ја отворале точката на седница на Влада, Давор Мацура бил криминалец? Дали тогаш Алта банка имала сомнителен капитал? Зошто молчеле за соработката на ДУИ со Мацура и Алта банка? Нам ни е јасно, само за ден повеќе власт, СДС се спремни на се!“, праша портпаролот на ВМРО-ДПМНЕ.
Манасиевски оцени дека со ова на јавноста ѝ станува јасно зошто опозициската партија и нејзиниот лидер Венко Филипче биле толку гласни околу прашањето за Алта банка, заклучувајќи дека „работи Фројд и дека одработуваат за свои интереси“.

