Во земјава е регистриран уште еден сомнителен случај на морбили кај дете на возраст над една година, за кое во тек се лабораториските испитувања, изјави денеска министерот за здравство Сашо Клековски. Досега во државата се потврдени вкупно пет случаи на мали сипаници, од кои четири се македонски државјани, а еден е странец.
Министерот истакна дека сите случаи епидемиолошки темелно се обработуваат за да се лоцираат и предупредат сите можни контакти, нагласувајќи дека државата располага со доволни количини на вакцини.
„Знам дека имаме зголемено ниво на вакцинирање. Имаме доволно на залиха вакцини, така што мислам дека на почетокот имавме околу 15.000, има и други достапни количини“, посочи Клековски, одговарајќи на новинарско прашање по посетата на Стоматолошкиот клинички центар.
Тој категорично демантираше дека Министерството за здравство или која било друга здравствена институција испратила насоки до министерствата за образование или за социјална политика за барање потврди за вакцинација и непримање на деца во установите.
„Ниеден дел од здравствените власти нема испратено препорака до соодветните други установи, зборуваме за образование за непримање на деца. Нашето апелирање е до родителите дека со невакцинирањето ги изложуваат сопствените деца, бебињата на ризик. Чинот на доброволност го нагласувам за да се избегнат моментите на постојните групи на антиваксери кои сметаат дека ова е повторно некаков заговор за да ги тераме родителите да ги вакцинираат децата. Нема никаков заговор. Моите деца се вакцинирани кога било време да бидат вакцинирани не отпосле. Апелирам до сите родители нема подобра заштита за сипаници од вакцинација. Сите заедно како општество треба да се вклучиме со јасна волја дека ова е единствен начин да спречиме епидемија и дека сите треба да направиме чекор кон тоа. Нема потреба да се закануваме, да присилуваме, да се фалсификуваат потврди и што уште не да се прави“, додаде Клековски.