Бојан Стојаноски, пратеник од редовите на ВМРО-ДПМНЕ во емисијата „Утринско еспресо’’ на Радио Лидер дискутираше за актуелните случувања поврзани со Алта банка, притоа посочи дека опозициската СДС шири хистерија, и како што кажа, граѓаните да не се грижат и да бидат спокојни затоа што Народна банка го администрира целиот процес.
„Ги видов тезите на СДС, вчера ги видов и законите, ги видов и фактичките ситуации, ги видов и документите од Народна банка и сметам дека денес треба да дадеме детална експликација, бидејќи сметам дека секако постои загриженост кај граѓаните бидејќи најголемата опозициона партија со денови ја држи таа тема и бесрамно лаже и продуцира факти коишто се далеку од вистината што е нормално дека граѓаните ќе имаат паника кога пред само шест години во државата при вака организиран систем, преку ноќ пропадна банка во којашто штедните влогови и парите на граѓаните, ги обештети самата држава бидејќи ништо повеќе од тоа не направи Народната банка или владата во тој момент, освен што прогласи стечај на банката“, кажа Стојаноски.
Стојаноски нагласи дека Народна банка превенирала се со цел клиентите коишто имаат сметки во Алта банка да бидат целосно неоштетени.
„Што е различно од Еуростандард банка и од Алта банка во овој момент? Тогаш Народната банка прогласи дека одзема лиценца и ја однесе банката веднаш во стечај без притоа да направи ништо за да ги заштити парите на граѓаните или барем да понуди банката да ја купи друг сопственик како што би било нормално. Додека сега Народната банка и покрај тоа што се работи за посебно народно лице, Алта банка Србија и Алта банка Македонија, за превенција ја презема банката и го администрира целиот процес, за да можат сите клиенти и сите оние коишто имаат сметки, внатре во Алта банка Македонија да бидат неоштетени и да можат додека таа банка не добие нов сопственик, тој транзиторен период да немаат никакво оштетување. Ниту према своите штедни влогови, ниту према обврските и да можат своите обврски кон банката целосно и секојдневно да ги извршуваат“, рече Стојаноски.