Премиерот на Албанија, Еди Рама, отворено проговори за актуелните студентски протести и незадоволството кое ги тресе улиците на Тирана, истакнувајќи дека демонстрантите не се заинтересирани за конструктивен дијалог, туку нивната единствена цел е негово заминување од премиерската функција.
Говорејќи за тензиите и политичката криза, Рама нагласи дека власта секогаш била отворена за разговори и решавање на проблемите низ институционален пат, но дека соговорниците од другата страна одбиваат било каков компромис.
„Тие не сакаат разговор, ниту пак бараат решенија за реалните проблеми. Нивната единствена цел е јасна – бараат само да си заминам“, изјави Рама, осврнувајќи се на притисоците со кои се соочува неговиот кабинет.
Протестите, кои започнаа поради политички и социјални прашања, продолжуваат да ги држат институциите во зголемена готовност, додека политичката сцена во земјата останува силно поделена.