Врховниот суд ги укина пресудите на Основниот суд Тетово и Апелациониот суд Гостивар за случајот со модуларната болница во Тетово и го врати предметот на повторно постапување и одлучување пред првостепениот суд.
Одлуката била донесена на седница на Советот за казниви дела на 22 октомври, откако судот ги уважил барањата за вонредно преиспитување на правосилната пресуда, поднесени од осудените преку нивните бранители.
„Советот за казниви дела при Врховниот суд на Република Северна Македонија, на седницата одржана на ден 22.10.2026 година, донесе пресуда во предметот КВП2-36/26 (во јавноста познат како Модуларна болница Тетово), со која ги уважи барањата за вонредно преиспитување на правосилната пресуда на осудените, поднесени преку нивните бранители“, се наведува во соопштението.
Со оваа одлука се укинати пресудата на Основниот суд Тетово од 16 мај 2025 година и пресудата на Апелациониот суд Гостивар од 26 ноември 2025 година.
Истовремено, Врховниот суд го отфрлил како недозволено барањето за вонредно преиспитување поднесено од обвинетото правно лице ЈЗУ Клиничка болница Тетово. Предметот повторно ќе се разгледува пред Основниот суд Тетово.
Во пожарот во модуларната болница загинаа 14 лица кои се лекуваа од ковид-19, а 12 беа повредени. Предметот претходно веќе еднаш беше вратен на повторно судење со одлука на Апелациониот суд Гостивар.
Во втората жалбена постапка, во декември 2025 година, затворските казни за поранешните директори Фљорин Бесими и Артан Етеми беа зголемени од една и пол на три години затвор, додека паричната казна за Клиничката болница Тетово беше зголемена од еден на 1,3 милиони денари.