Граѓаните и понатаму ќе мора да ги носат пластичните лични карти и возачки дозволи, иако документите веќе се достапни и во електронска форма преку новата мобилна апликација „м.Услуги“.
Дигиталните документи засега нема да бидат прифатени при полициско легитимирање, бидејќи за нивно официјално признавање се неопходни измени во законската регулатива.
Министерот за дигитална трансформација, Стефан Андоновски, за сдк.мк потврдил дека при полициска контрола граѓаните ќе мора да покажат физичка лична карта или возачка дозвола. Тој посочил дека веќе се работи на потребните измени на законите и правилниците, но додека тие не стапат во сила, пластичните документи остануваат задолжителни при легитимирање.
Новата апликација „м.Услуги“, која вчера беше официјално претставена, овозможува пристап до дигитални документи, јавни услуги и известувања од институциите.
Нејзиното користење е бесплатно и доброволно, а во иднина се планира проширување на функционалностите, вклучително и можност за електронски плаќања.