Цените на нафтата на светските берзи денеска бележат пад, откако надежите за обновување на мировните преговори меѓу САД и Иран ги намалија стравувањата од прекини во снабдувањето со енергенси на Блискиот Исток.
Северноморската нафта „брент“ поевтини за 0,7 проценти, на околу 114,47 долари за барел, додека американската сурова нафта WTI падна за 1,1 процент, на 101,65 долари за барел, според податоците од утринското тргување.
Падот следува по растот во претходната трговска сесија, кога цената на „брент“ порасна за 1,3 проценти, а WTI за околу три проценти.
На пазарите влијаат сигналите за можни дипломатски разговори меѓу Вашингтон и Техеран. Според извештаите, американскиот потпретседател Џеј Ди Венс испратил писмо до ирански претставник со цел повторно отворање на преговорите, додека Катар доставил предлог-договор за завршување на војната меѓу САД, Израел и Иран. Сепак, од Техеран стигнале и сигнали дека предложените услови се неприфатливи.
И покрај надежите за дипломатско решение, ризиците за снабдувањето остануваат високи поради продолжените напади на Блискиот Исток. Инвеститорите внимателно ги следат случувањата во регионот, особено по извештаите за напади врз енергетската инфраструктура и транспортните рути.
Дополнително влијание врз пазарот имаат и најновите податоци за резервите на нафта во САД. Тие се намалиле за 1,9 милиони барели во неделата заклучно со 23 октомври, додека резервите на бензин се зголемиле за 3,9 милиони барели.
Движењето на цените во наредните денови ќе зависи од развојот на конфликтот на Блискиот Исток, можноста за продолжување на преговорите и состојбата со глобалното снабдување со нафта.