Србија нема да може да постигне напредок на својот европски пат доколку не воведе санкции кон Русија и не ја усогласи својата политика со Европската Унија, порача европската комесарка за проширување Марта Кос.
Кос директно одговори на прашањето дали ќе биде можно Србија да стане членка на сојузот доколку не се приклучи кон казнетите мерки против Москва.
Нема да биде можно земја која не се усогласува со нас по стратешките интереси, кои се, секако, надворешната и безбедносната политика, или заедничката борба против Русија, особено во контекст на руската војна во Украина, да напредува. Тоа ќе биде многу, многу тешко – рече Кос.
Таа појасни дека Европската Унија сè уште ги чека чекорите на српските власти по однос на формирањето на новите институции.
Значи, прво треба да формираат нова влада, а потоа ќе видиме како и дали ќе можеме да продолжиме во оваа област – изјави Кос.
Еврокомесарката претходно оствари разговор со Илија Срдановиќ, првиот кандидат на Студентската листа, при што посочи дека Брисeл останува подготвен да ја поддржи новата српска влада на нејзиниот европски пат.
Сепак, Кос истакна дека од Белград ќе се бараат конкретни резултати и посветеност на преземените обврски.
Србија ќе мора да испорача повеќе. Ќе ја видиме сериозноста на нивната влада по изборите, ако не зборуваат само за желбата да бидат членка, туку всушност работат на тоа, особено во однос на стратешката координација и усогласувањето со заедничката надворешна и безбедносна политика – изјави Марта Кос за време на презентацијата на планот за проширување пред Комитетот за надворешни работи на Европскиот парламент.
Таа додаде дека Србија во моментов не се наоѓа во групата на најнапредни земји кандидатски кои ќе добијат посебни мапи на патот во процесот на пристапување, каде што се позиционирани Црна Гора, Албанија, Молдавија и Украина.