Републичкиот хидрометеоролошки завод на Србија (РХМЗ) најавува постудено и пооблачно време од петок, со повремени врнежи од дожд и дневни температури кои главно ќе се движат помеѓу 12 и 15 степени.
Денеска во Србија претпладнето на север и запад ќе биде сончево, додека попладне се очекува умерена облачност. Во останатиот дел од земјата ќе преовладува облачно време, со слаб дожд на одделни места и краткотраен снег на високите планини.
Според прогнозата на РХМЗ, утре и во четврток се очекува малку до умерено облачно и претежно суво време со сончеви периоди, а максималните дневни температури ќе се движат од 12 до 15 степени Целзиусови.
Од петок следува дополнително заладување со локални врнежи од дожд, додека за почетокот на следната недела се најавува и снежна покривка во одредени региони.
„Зимата тропа на вратата на почетокот на ноември. Снежна покривка во понеделник, 2 ноември, во ридско-планинските подрачја на југозапад и југ од Србија, влеговме во постуден период поизразен на почетокот на ноември и без крај на повидок засега“, изјави метеоролошкиот познавач Иван Ристиќ за „Курир“.
Во официјалната климатска прогноза за ноември, РХМЗ наведува дека се очекува просечно топол и дождлив месец, со температури за еден степен над повеќегодишниот просек.
„Во Србија се очекува топол ноември со просечна температура на воздухот од околу еден степен над повеќегодишниот просек, во опсег од шест до девет степени. Просечната максимална температура на воздухот за ноември се предвидува да биде во опсег од 11 до 14 степени во пониските региони, во планинските региони од пет до десет, а просечната минимална температура на воздухот во опсег од два до шест, а во планините од -1 до 2“, соопштуваат од РХМЗ.
Од метеоролошката служба додаваат дека во пониските региони се очекуваат од четири до 10 мразовити денови, додека на планините тој број ќе достигне до 18 дена. Врнежите ќе бидат во рамки на повеќегодишниот просек, со предвидени 9 до 12 денови со врнежи во пониските делови и до 17 дена во планинските подрачја.