Европските земји ги повикаа своите граѓани кои патуваат во Франција да избегнуваат масовни собири и да бидат крајно внимателни поради влошената безбедносна состојба на терен, откако во текот на викендот беа уапсени илјадници лица, а продавниците беа ограбени за време на протестите.
Демонстрациите низ Франција поради високите цени и влошувањето на јавните услуги ескалираа во саботата, при што дојде до палење на градското собрание и судири меѓу насилните групи и полицијата. Поради актуелната состојба, министерствата за надворешни работи на неколку европски земји издадоа нови предупредувања, пренесува Ројтерс.
Италијанските власти им препорачаа на своите граѓани да го регистрираат престојот преку специјална веб-страница или апликација и да избегнуваат собири. Германија предупреди на можни нови немири, потсетувајќи ги своите државјани дека непочитувањето на полициските наредби за напуштање на нерегистрирани собири може да доведе до казни.
Чешка и Полска исто така апелираа до своите граѓани да ги заобиколуваат местата каде што се одржуваат протести, додека холандската влада ажурираше слични насоки за патување. Слични упатства издадоа и нордиските земји – Данска, Шведска, Финска и Норвешка, барајќи од своите граѓани строго почитување на инструкциите од локалните власти.