Уште едно лице почина како последица од вирусот на западнонилска треска, со што вкупниот број смртни случаи во земјава се искачи на 12.
Според последните објавени податоци на веб-страницата healthalert, од почетокот на годинава во државата се евидентирани вкупно 72 лица заразени со овој вирус, а во текот на последната недела е регистриран еден нов случај.
Од вкупниот број регистрирани пациенти, 58 лица целосно оздравеле, додека двајца пациенти сè уште се наоѓаат на болничко лекување, објави 4news.mk.
Западнонилската треска претставува вирусно заболување кое најчесто се пренесува преку каснување од заразени комарци. Кај најголемиот дел од инфицираните болеста минува без симптоми или со поблаги симптоми, но кај одредени лица, особено кај повозрасните и хроникарите, може да предизвика сериозни здравствени компликации.
Здравствените власти апелираат на преземање превентивни мерки за заштита од комарци, како користење заштитни средства (репеленти), носење соодветна облека со долги ракави и ногавици, како и редовно отстранување на застоена вода од дворовите и околината каде што комарците се размножуваат.