По повод 16 Октомври, Светскиот ден на храната, денеска во Кисела Вода ќе се одржи панел-дискусија посветена на електронската трговија со храна, нејзиното рекламирање и медиумска промоција, како и на додатоците во исхраната и храната наменета за спортисти.
На настанот ќе се обратат директорот на Агенцијата за храна и ветеринарство (АХВ), д-р Оливер Миланов, градоначалничката на Општина Кисела Вода, Бети Стаменкоска, и директорката на Институтот за јавно здравје, д-р Марија Андоновска.
Панел-дискусијата ќе се одржи во Домот на културата „Билјана Беличанец“, во организација на Општина Кисела Вода, Агенцијата за храна и ветеринарство и Институтот за јавно здравје.
Меѓу учесниците ќе бидат граѓани, претставници на градинки, основни и средни училишта од општината, спортски клубови, оператори со храна и други локални чинители.