Контејнерски брод што плови под сингапурско знаме потона во близина на Ормутскиот теснец откако беше погоден од проектил, додека истовремено се известува и за тонење на транспортер на сув товар кој бил оштетен во претходен напад, соопштија извори од поморската безбедност.
Инцидентите се случуваат во време на остра ескалација на заканите за комерцијалниот превоз во овој витален воден пат, каде што нападите во последните 10 дена бележат значителен пораст.
Погодениот брод GFS Pride, со капацитет од 2.824 TEU единици, потонал додека пловел низ теснецот. Од Поморската и пристанишна управа на Сингапур (MPA) потврдија дека бродот претрпел штета и пожар пред целосно да потоне.
„GFS PRIDE претрпе штета и пожар на бродот, а оттогаш потона. Сите 21 член на екипажот беа безбедно евакуирани. Не се пријавени повредени“, се вели во соопштението на MPA.
Ова е втор брод што потонува откако започна војната меѓу САД и Иран на 28 февруари, покажуваат податоците од Меѓународната поморска организација (агенција на ООН за превоз). Властите во Сингапур остри ги осудија овие настани:
„Ваквите напади се неиспровоцирани, неоправдани и претставуваат кршење на меѓународното право“, изјавија тие.
Менаџерот на бродот, компанијата GFS Ship Management FZE со седиште во Обединетите Арапски Емирати, сè уште не е достапен за коментар.
Ескалација на тензиите во клучниот трговски пат
Ормутскиот теснец е од критично значење за глобалната енергетска мрежа, со оглед на тоа што пред војната низ него минуваше околу една петтина од светската трговија со нафта и течен природен гас.
Техеран продолжува со притисокот врз водниот пат како одговор на американско-израелските напади од 28 февруари, со цел ограничување на транзитот и добивање политичко влијание врз Вашингтон. Од друга страна, САД воведоа поморска блокада на иранските пристаништа и ги проширија санкциите со цел зајакнување на економскиот притисок.
Според аналитичарите, Иран применува нови тактики со цел да ги одржи цените на нафтата високи и да влијае на среднорочните избори во САД.