Советот на јавни обвинители денеска ќе ги сослуша петте кандидати за раководител на Основното јавно обвинителство за гонење организиран криминал и корупција во Скопје. Седницата е закажана за 11 часот, кога пријавените кандидати ќе ги образложат своите кандидатури за функцијата.
За позицијата конкурираат вишиот јавен обвинител Јован Цветановски, обвинителот Трајче Пеливанов, поранешен обвинител во Специјалното јавно обвинителство, Лидија Раичевиќ од Основното јавно обвинителство Скопје, како и обвинителите од ОЈО ГОКК, Искра Хаџи-Василева и Фатон Азизи.
За спроведување на постапката Советот формираше комисија во состав Ермон Незири, Светлана Стојковиќ и Кети Петкова. Изборот на новиот шеф на ОЈО ГОКК е предвиден за 28 октомври, од 8 до 16 часот, со тајно и непосредно гласање на јавните обвинители.
Новиот раководител ќе го наследи Ислам Абази, чиј мандат истекува. Абази беше избран на функцијата во октомври 2022 година.
Огласот за избор на нов основен јавен обвинител на ОЈО ГОКК беше објавен во „Службен весник“ на 21 август годинава.