Романија официјално достави доверливи податоци до Брисел во рамките на тековната истрага што Европската комисија ја води против платформата ТикТок. Оваа постапка е тесно поврзана со поништените претседателски избори во земјата во 2024 година, објави „Диџи24“, повикувајќи се на изјава од портпаролот на Европската комисија, Тома Рение.
Доколку истрагата утврди дека платформата е одговорна за можни прекршувања, ТикТок се соочува со драконска казна – до шест проценти од својот вкупен глобален промет. Според наводите од изворот, завршувањето на истрагата се очекува до крајот на оваа или на почетокот на следната година.
Потсетуваме, Европската комисија уште во декември 2024 година покрена официјална постапка против популарната социјална мрежа. Причина за тоа беа сериозните сомневања за прекршување на европскиот Закон за дигитални услуги (DSA), кој строго ги регулира прашањата поврзани со нелегалните содржини, транспарентноста при финансирањето на рекламите и ширењето дезинформации.
Постапката беше отворена откако Уставниот суд на Романија донесе одлука за поништи првиот круг од претседателските избори. Ваквиот чекор уследи по информациите за можно надворешно мешање и сомневањата за координирана кампања на ТикТок во корист на независниот кандидат за претседател од крајната десница, Калин Џорџеску.
Главниот фокус и загриженост на европските институции се однесуваат на начинот на кој функционираат алгоритмите за препорачување содржини на платформата, како и на системот за политичко рекламирање, кој според европските прописи подлежи на задолжително и јасно означување.