Необичен инцидент се случи на аеродромот во Лос Анџелес кога два патнички авиона се судрија додека се движеа по пистата, а дел од едниот авион беше оштетен во контактот.
Несреќата се случила помеѓу авионите на Делта Ер Лајнс и Ер Канада. Авионот на Ер Канада претходно пристигнал од Торонто и слетал на аеродромот, додека авионот на Делта во тој момент таксирал на површината на аеродромот.
Во авионот на Делта имало вкупно 290 патници и членови на екипажот. Според сведоштвото на еден од патниците, нивниот авион се движел низ аеродромот кога другиот авион одеднаш му се појавил на патот. Последиците од судирот се снимени на камери. Снимките го покажуваат стабилизаторот на опашката на авионот на Ер Канада сериозно оштетен и речиси целосно одвоен, додека дел од другиот авион останал заглавен по ударот.
Двата авиона се извадени од употреба по инцидентот, објавува ABC6. Засега нема дополнителни детали за околностите што довеле до контакт на двата авиона на површината на аеродромот.