Ситуацијата во Приштина ескалираше во понеделникот вечерта, кога демонстранти и полицијата се судрија пред Собранието на Косово за време на протестите поврзани со Специјализираните совети во Хаг.
Полицијата употреби солзавец и водени топови за да ги растера демонстрантите, откако дел од нив фрлаа пиротехнички средства, шишиња и други предмети кон полицајците и државните институции. На улиците во близина на Собранието беа запалени и контејнери.
Според косовската полиција, во инцидентите се повредени шестмина полицајци, додека 11 граѓани побарале медицинска помош. Тројца демонстранти биле приведени.
Протестите беа организирани поради пресудите на Специјализираните совети во Хаг против поранешни команданти на ОВК, меѓу кои и поранешниот косовски претседател Хашим Тачи. Демонстрантите бараат измени на законот со кои би се ограничиле надлежностите на судот, вклучително и ограничување на затворските казни и можност осудените да ја издржуваат казната во Косово.
Косовското собрание претходно во текот на денот ги усвои измените во прво читање, но второто читање и конечното гласање останаа неизвесни.
По неколкучасовните тензии, демонстрантите се повлекоа од просторот околу Собранието и ситуацијата се смири пред полноќ.